Intro

Riba djárason 29 di òktober 2025 tin elekshon adelantá pa Tweede Kamer. E elekshon akí ta adelantá, pa motibu ku gobièrnu hulandes no por sigui traha huntu mas.

Tweede Kamer ta traha lei i tuma desishon ku ta importante pa Hulanda. I ku esaki pa Boneiru tambe. Pa medio di vota, bo ta yuda disidí ken ta haña asiento den Tweede Kamer. Di e manera akí bo ta disidí un tiki asina kua ta e leinan ku nan ta traha. Pa e motibu akí ta importante pa bo bai vota pa elekshon di Tweede Kamer. 

Ken tin mag di vota

Entidat públiko Boneiru a fiha adelantá ken tin mag di vota pa elekshon. Esaki ta pará den Lei elektoral. Bo por vota pa Tweede Kamer si:
- bo tin 18 aña òf ta mas bieu dia 29 di òktober 2025.
- bo tin nashonalidat hulandes.
- 15 di sèptèmber 2025 bo tabata inskribí komo habitante di Boneiru.
- bo no ta ekskluí di derechi di voto.

Pas pa bai vota no a drenta, ta pèrdí òf ta kibrá

E ora ei ku e formulario ‘pas pa vota remplasante’, for di 20 di òktober 2025,  bo por pidi un pas remplasante na departamento di Asuntu Sivil.
Download aki e formulario pa pas pa vota remplasante.

Por hasi e petishon na dos forma:
1. Yena e formulario ‘pas pa vota remplasante’ i mand’é via mail pa verkiezingenbonaire@bonairegov.com. Mester entregá e formulario yená pa mas tardá djabièrnè 24 di òktober 2025 na departamento di Asuntu Sivil.
2. Pasa na departamento di Asuntunan Sivil, Kaya Neerlandia 40. Bai  ku e formulario yená. Ora di ofisina ta di djaluna te ku djaweps di 08:00 – 15:00 or. Te djamars 28 di òktober 2025, 12:00 or, bo por pasa buska e pas pa vota remplasante na bali di Asuntunan Sivil. No lubidá di bai ku un prueba di identifikashon bálido.

Prueba di identidat

Bai urna ku bo pas pa vota i bo prueba di identidat.
Un prueba di identidat:
- un pasaporte hulandes, karchi di identidat, reibeweis òf sédula

Bo por vota ku bo prueba di identidat si dia 29 di òktober 2025 e no a kaduká mas ku 5 aña pasá. Chèk e fecha di  ‘bálido te’  riba bo prueba di identidat. Si tin un fecha di 30 di òktober 2020 òf despues di esei, bo tin mag di vota.

Prueba di identidat pèrdí òf hòrtá

Bo a pèrdè bo prueba di identidat òf e ta hòrtá? Bo tin mag di vota e ora ei si bo tin prosèsverbal di polis ku bo prueba di identidat ta pèrdí. Bo por vota tambe si bo tin un deklarashon di pèrdida ku bo a haña di entidat públiko Boneiru. E ora ei bo mester mustra e prosèsverbal, òf e deklarashon di entidat públiko. Bo mester mustra e ora ei tambe un pas ku bo nòmber i portrèt, por ehèmpel un pas di bo trabou.

Laga un otro hende vota pa bo

Bo no por bai urna òf bo no ke hasi esei? Bo por pidi e ora ei un otro votadó pa vota na bo nòmber. E ora ei bo ta outorisá e persona ei, esta bo ta dun’é un apoderashon. Pa mas informashon wak riba e página akí na pregunta hopi hasí ‘Laga un otro votadó vota pa bo.’

Vota pafó di Boneiru

Bo no ta na Boneiru dia 29 di òktober 2025? I bo tin gana pa bo mes bai vota? Apliká e ora ei pa un pas pa vota den eksterior.  Si bo apliká pa un pas pa vota den eksterior, bo pas pa vota no ta bálido mas. Pa mas informashon lesa riba e página na pregunta hopi hasí ‘Apliká pa pas pa vota pafó di Boneiru.

Pa kiko bo ta vota

Durante elekshon pa Tweede Kamer bo ta skohe e kandidato di kua bo ta pensa ku e ta meresé bo voto. Bo voto i voto di e otro votadónan ta determiná kua ta e 150 hendenan ku despues di elekshon ta bai den Tweede Kamer.

Kiko ta Tweede Kamer

Den Tweede Kamer tin 150 hende. Esakinan ta hende di diferente partido polítiko. Nan ta papia i disidí tokante e hendenan na Hulanda.

Durante elekshon di Tweede Kamer bo ta skohe un hende ku ke partisipá na elekshon pa Tweede Kamer: un kandidato. E kandidato akí ta pertenesé na un partido polítiko i e ta mustra kiko e ideanan i e plannan di e partido akí ta. Despues di elekshon e 150 kandidatonan ku nan a skohe ta bai den Tweede Kamer.

Tareanan di Tweede Kamer

Tweede Kamer ta deliberá tokante kon gobièrnu mester regla tur kos na Hulanda. Tweede Kamer ta disidí tambe tokante lei nobo. Ku bo voto bo ta skohe kua ta e kandidatonan i partidonan ku ta bai den Tweede Kamer. Mas tantu voto un partido haña, mas tantu influensia e partido ei tin. Di e manera ei bo voto tin influensia riba desishonnan importante pa Hulanda.    

Informashon tokante partido i kandidatonan

Riba wèpsait di Konseho Elektoral (Kiesraad.nl) bo ta haña informashon tokante e partidonan polítiko ku ta partisipá na elekshon. Promé ku elekshon bo ta haña na kas un lista ku tur e kandidatonan ku ta partisipá. Riba e wèpsaitnan di e partidonan polítiko bo ta lesa tokante nan plannan.

Laga un otro votadó vota pa bo

Bo por pidi un hende pa bai vota pa bo. Ta yama esaki apoderá un hende.
Por hasi esaki na 2 manera:
1. ku bo pas pa bai vota (apoderashon via bo pas pa vota)
2. via un formulario di apoderashon (apoderashon por eskrito)
Un persona apoderá por vota pa un máksimo di 2 otro persona.

Apoderashon via pas pa vota

Ku un apoderashon via pas di vota bo por pidi un otro hende te dia di elekshon mes pa vota pa bo. Bo mes tin mag di skohe ken bo ta apoderá. E persona ku ta vota pa bo (e hende apoderá) mester:
- tin derecho di voto;
- ta biba na Boneiru;
si e persona ku ta vota pa bo (e hende apoderá) no ta biba na Boneiru, e ora ei bo or yena un formulario di outorisashon (wak na ‘outorisashon via formulario di outorisashon’);
- mester vota pa bo pareu ora e ta vota pa su mes.

Asin’aki bo por outorisá un hende via bo pas pa vota:
1. Yena e parti patras di bo pas pa vota. Hasi esaki huntu ku e persona ku bo ke outorisá. E ora ei bo ta sigur ku bo ta outorisá e persona korekto.
2. Duna e persona outorisá bo pas pa vota i un kopia di bo prueba di identidat pa bai kuné. Esaki tin mag di ta un portrèt di bo prueba di identidat saká skèrpi i kla ku tin riba bo selular òf tèblet.
3. E persona apoderá ta mustra kopia di bo prueba di identidat na urna. E persona apoderá mester muestra su mes prueba di identidat tambe.

Apoderashon via formulario

Bo por apoderá via un formulario di outorisashon tambe pa un otro votadó vota pa bo. Esaki yama un apoderashon por eskrito. Esaki por ta por ehèmpel un solushon si bo ta pa basta tempu pafó di Boneiru.

Ku un apoderashon por eskrito bo por outorisá un hende na Boneiru òf na un otro entidat públiko òf na un munisipio na Hulanda pa vota pa bo.

Pa un apoderashon por eskrito bo mester di un formulario pa outorisashon. Bo por download esaki aki . Òf bo por buska e formulario na bali di departamento di Asuntu Sivil. E formulario mester a drenta pa mas tardá djabièrnè 24 di òktober 2025 na departamento di Asuntu Sivil. Meil e formulario na verkiezingenbonaire@bonairegov.com òf entregá e formulario na departamento di Asuntu Sivil.
E orario di ofisina di departamento di Asuntu Sivil ta : di djaluna te ku djaweps di 08:00 te 15:00 or.

E persona ku ta vota pa bo (e persona apoderá) mester di:
- tin derecho di voto;
- vota pa bo pareu ku e ta vota pa su mes.

Asina bo ta apoderá un hende ku un formulario di outorisashon:
1. Abo i e hende ku ta bai vota pa bo (e hende outorisá) ta yena e formulario. Laga e hende ku bo ke outorisá yena e formulario promé ku abo mes hasi esei. Asina bo ta sigur ku bo a outorisá e persona korekto.
2. Entregá e formulario pa mas tardá djabièrnè 24 di òktober 2025 na departamento di Asuntu Sivil.
3. E persona outorisá ta haña un prueba di apoderashon, ku esaki e por vota pa bo. Si departamento di Asuntu Sivil a aprobá e prueba di apoderashon, no por hala esaki aden mas.
4. E persona outorisá ta bai urna ku e prueba di apoderashon por eskrito. Bo no tin nodi di duna kopia di bo prueba di identidat pa e bai kuné.

Kon mi por duna e persona ku mi ke apoderá un kopia seif di mi prueba di identidat pa bai kuné?

Ku e app KopieID di gobièrnu di reino, bo por saka kopia di bo prueba di identidat na un manera seif. E ora ei bo por hasi e potrèt ilegibel. Si bo tin un Burgerservicenummer (BSN), e ora ei bo por hasi esaki tambe ilegibel.

Paga tinu: wak bon unda e number di servisio sivil, BSN, ta pará riba bo prueba di identidat. E number akí por ta pará tambe den un repi abou di e dokumento. Wak pa ei tambe bo kambia e number di BSN di tal forma ku no por les’é.

Riba e dokumento mester tin bo nòmber, fecha di nasementu, firma i e fecha di balides di e dokumento. Pues bo no tin mag di kambia nan di tal forma ku no por lesa nan mas.

Ku e app KopieID bo por pone un marka di awa tambe den e dokumento. Den e marka di awa akí bo ta pone e meta pa kua bo ta traha e kopia. Despues bo por manda e kopia òf prent e.

Download KopieID app

Bo por download e KopieID den Apple App Store òf Google Play Store, E app ta un produkto di Servisio di Gobièrnu di Reino pa Dato di identidat, ku ta parti di ministerio di Asuntu Interno i Relashon di Reino.

Pa kuantu hende mi tin mag di vota ku un apoderashon

Pa kada elekshon bo tin mag di vota pa maksimal 2 hende ku apoderashon. Esaki por solamente pareu ora ku bo mes ta vota.

Apliká pa pas pa vota pafó di Boneiru

Dia 29 di òktober 2025 bo no ta na Boneiru pero na un otro munisipio òf entidat públiko? I bo tin gana pa bo mes bai vota? Apliká e ora ei pa e pas pa vota pafó di Boneiru. Ku e pas pa vota pafó di Boneiru bo por vota rònt Hulanda, òf den kada un di e entidatnan públiko.

Si bo a apliká pa un pas pa vota pafó di Boneiru, bo por vota solamente ku e pas akí. Bo no ta haña un pas nobo si bo pèrdè esaki. Na urna bo ta duna bo pas pa vota pafó di Boneiru i bo ta mustra bo prueba di identidat.

Bo por apliká na dos manera pa bo pas pa vota pafó di Boneiru:
1. Ònlain via e formulario aki. Por hasi  esaki for di djaweps 25 di sèptèmber 2025 te ku djabièrnè 24 di òktober 2025. Ta manda e pas pa bo vota pafó di Boneiru na kas pa bo.
2. Na bali di elekshon na departamento di Asuntu Sivil, Kaya Neerlandia 40. Esei por di djaweps 25 di sèptèmber 2025 te djamars 28 di òktober 2025, 12:00 or. Bai ku bo prueba di identidat bálido na e bali di elekshon. Bo ta haña bo pas pa vota pafó di Boneiru mesora.