Djaweps 6 di yüni nos ta skohe miembro hulandes pa Parlamento Oropeo.
Parlamento Oropeo ta tuma desishon ku por tin influensia pa bida na Hulanda. I ku esaki pa Boneiru tambe. Pues ku bo voto bo tin influensia riba futuro di Hulanda i Boneiru. P’esei ta importante pa bai vota. 

Ken tin mag di vota

Entidat públiko Boneiru a fiha adelantá ken tin mag di vota pa elekshon. Esaki ta pará den Lei elektoral. Bo por vota pa Parlamento Oropeo si:
bo tin 18 aña òf ta mas bieu dia 6 di yüni 2024.
bo tin nashonalidat hulandes.
23 di aprel 2024 bo tabata inskribí komo habitante di Boneiru.
bo no ta ekskluí di derechi di voto.

Pas pa vota

Bo ta haña bo pas pa bai vota ku pòst den e siman di 23 di mei 2024. Bo ta haña bo pas pa vota na e adrès ku bo tabata inskribí na dje dia 23 di aprel 2024. Warda bo pas pa bai vota bon. Bo mester di dje pa bo por bai vota.

Pas pa bai vota no a drenta, ta pèrdí òf ta kibrá

E ora ei ku e formulario ‘pas pa vota remplasante’, for di 24 di mei 2024,  bo por pidi un pas remplasante na departamento di Asuntu Sivil.
Download aki e formulario pa pas pa vota remplasante.
Por hasi e petishon na dos forma:
1. Yena e formulario ‘pas pa vota remplasante’ i mand’é via mail pa verkiezingenbonaire@bonairegov.com . Mester entregá e formulario yená pa   mas tardá djaluna 3 di yüni 2024 na departamento di Asuntu Sivil.  
2. Pasa na departamento di Asuntu Sivil, Kaya Neerlandia 40. Bai  ku e formulario yená. Ora di ofisina ta di djaluna te ku djaweps di 08:00 – 15:00 or. Te djárason 5 di yüni 2024, bo por pasa buska e pas pa vota remplasante. No lubidá di bai ku un prueba di identifikashon bálido.

Prueba di identidat

Bai urna ku bo pas pa vota i bo prueba di identidat.
Un prueba di identidat:
- un pasaporte hulandes, karchi di identidat, reibeweis òf sédula
Bo por vota ku bo prueba di identidat si 6 di yüni 2024 e no a kaduká mas ku 5 aña pasá. Chèk e fecha di  ‘bálido te’  riba bo prueba di identidat. Si tin un fecha di 7 di yüni 2019 òf despues di esei, bo tin mag di vota.

Prueba di identidat pèrdí òf hòrtá

Bo a pèrdè bo prueba di identidat òf e ta hòrtá? Bo tin mag di vota e ora ei si bo tin prosèsverbal di polis ku bo prueba di identidat ta pèrdí. Bo por vota tambe si bo tin un deklarashon di pèrdida ku bo a haña di entidat públiko Boneiru. E ora ei bo mester mustra e prosèsverbal, òf e deklarashon di entidat públiko. Bo mester mustra e ora ei tambe un pas ku bo nòmber i portrèt, por ehèmpel un pas di bo trabou.

Laga un otro hende vota pa bo

Bo no por bai urna òf bo no ke hasi esei? Bo por pidi e ora ei un otro votadó pa vota na bo nòmber. E ora ei bo ta outorisá e persona ei, esta bo ta dun’é un apoderashon. Pa mas informashon wak riba e página akí na pregunta hopi hasí ‘Laga un otro votadó vota pa bo.’

Vota pafó di Boneiru

Bo no ta na Boneiru 6 di yüni 2024? I bo tin gana pa bo mes bai vota? Apliká e ora ei pa un pas pa vota den eksterior.  Si bo apliká pa un pas pa vota den eksterior, bo pas pa vota no ta bálido mas. Pa mas informashon lesa riba e página na pregunta hopi hasí ‘Apliká pa pas pa vota pafó di Boneiru.

Ki bo ta vota

Pa elekshon di Parlamento Oropeo bo ta skohe e kandidato ku segun bo meresé bo voto. Bo voto i voto di otro votadó ta determiná ken ta bira e 31 hulandesnan ku despues di elekshon ta drenta Parlamento Oropeo.

Kiko ta Parlamento Oropeo

Parlamento Oropeo ta konsistí di 720 miembro skohé. Tin 31 miembro di Hulanda aden. Nan tur ta sintá na nòmber di diferente partido polítiko. Mas tantu voto un partido haña ku elekshon, mas tantu asiento (ke men miembro) nan ta haña den Parlamento Oropeo. E miembronan hulandes ta traha huntu ku miembro di otro pais ku tin mesun ideanan ku nan.

Tareanan di Parlamento Oropeo

E miembronan di Parlamento Oropeo ta papia kon Union Oropeo mester regla su asuntunan. Nan ta traha lei i ta disidí tokante lei nobo. Nan ta hasi esaki huntu ku representantenan di gobièrnunan di paisnan di Union Oropeo. E leinan aki tin influensia den bida di habitantenan di Union Oropeo Nan ta trata di ekonomia por ehèmpel, kombatimentu di pobresa, klima i seguridat.
Parlamento Oropeo ta aprobá presupuesto pa e plannan di Union Oropeo i ta kontrolá kon ta usa e plaka. Parlamento Oropeo ta nombra tambe un presidente i komisarionan di Komishon Oropeo i ta kontrolá nan.
Den Komishon Oropeo tin 27 komisario. Tin un komisario di kada pais di Union Oropeo. Komishon Oropeo ta proponé plan nobo. I ta kontrolá si e 27 paisnan di Union Oropeo ta tene nan mes na plan i regla di Union Oropeo.

Informashon tokante partido i kandidatonan

Riba wèpsait di Konseho Elektoral (Kiesraad.nl) bo ta haña informashon tokante e partidonan polítiko ku ta partisipá na elekshon. Promé ku elekshon bo ta haña na kas un lista ku tur e kandidatonan ku ta partisipá. Riba e wèpsaitnan di e partidonan polítiko bo ta lesa tokante nan plannan.

Laga un otro votadó vota pa bo

Bo por pidi un hende pa bai vota pa bo. Ta yama esaki apoderá un hende.
Por hasi esaki na 2 manera:
1. ku bo pas pa bai vota (apoderashon via bo pas pa vota)
2. via un formulario di apoderashon (apoderashon por eskrito)
Un persona apoderá por vota pa un máksimo di 2 otro persona.

Apoderashon via pas pa vota

Ku un apoderashon via pas di vota bo por pidi un otro hende te dia di elekshon mes pa vota pa bo. Bo mes tin mag di skohe ken bo ta apoderá. E persona ku ta vota pa bo (e hende apoderá) mester:
- tin derecho di voto;
- ta biba na Boneiru;
si e persona ku ta vota pa bo (e hende apoderá) no ta biba na Boneiru, e ora ei bo or yena un formulario di outorisashon (wak na ‘outorisashon via formulario di outorisashon’);
- mester vota pa bo pareu ora e ta vota pa su mes.

Asin’aki bo por outorisá un hende via bo pas pa vota:
1. Yena e parti patras di bo pas pa vota. Hasi esaki huntu ku e persona ku bo ke outorisá. E ora ei bo ta sigur ku bo ta outorisá e persona korekto.
2. Duna e persona outorisá bo pas pa vota i un kopia di bo prueba di identidat pa bai kuné. Esaki tin mag di ta un portrèt di bo prueba di identidat saká skèrpi i kla ku tin riba bo selular òf tèblet.
3. E persona apoderá ta mustra kopia di bo prueba di identidat na urna. E persona apoderá mester muestra su mes prueba di identidat tambe.

Apoderashon via formulario

Bo por apoderá via un formulario di outorisashon tambe pa un otro votadó vota pa bo. Esaki yama un apoderashon por eskrito. Esaki por ta por ehèmpel un solushon si bo ta pa basta tempu pafó di Boneiru.
Ku un apoderashon por eskrito bo por outorisá un hende na Boneiru òf na un otro entidat públiko òf na un munisipio na Hulanda pa vota pa bo.
Pa un apoderashon por eskrito bo mester di un formulario pa outorisashon. Bo por download esaki aki . Òf bo por buska e formulario na bali di departamento di Asuntu Sivil. E formulario mester a drenta pa mas tardá djaluna 3 di yüni na departamento di Asuntu Sivil. Meil e formulario na verkiezingenbonaire@bonairegov.com òf entregá e formulario na departamento di Asuntu Sivil.
E orario di ofisina di departamento di Asuntu Sivil ta : di djaluna te ku djaweps di 08:00 te 15:00 or.
E persona ku ta vota pa bo (e persona apoderá) mester di:
- tin derecho di voto;
- vota pa bo pareu ku e ta vota pa su mes.

Asina bo ta apoderá un hende ku un formulario di outorisashon:
1. Abo i e hende ku ta bai vota pa bo (e hende outorisá) ta yena e formulario. Laga e hende ku bo ke outorisá yena e formulario promé ku abo mes hasi esei. Asina bo ta sigur ku bo a outorisá e persona korekto.
2. Entregá e formulario pa mas tardá djaluna 3 di yüni na departamento di Asuntu Sivil.
3. E persona outorisá ta haña un prueba di apoderashon, ku esaki e por vota pa bo. Si departamento di Asuntu Sivil a aprobá e prueba di apoderashon, no por hala esaki aden mas.
4. E persona outorisá ta bai urna ku e prueba di apoderashon por eskrito. Bo no tin nodi di duna kopia di bo prueba di identidat pa e bai kuné.

Kon mi por duna e persona ku mi ke apoderá un kopia seif di mi prueba di identidat pa bai kuné?

Ku e app KopieID di gobièrnu di reino, bo por saka kopia di bo prueba di identidat na un manera seif.  E ora ei bo por sòru ku no por wak e portrèt ku tin ariba bon i ku no por lesa e number di servisio na siudadano Burgerservicenummer, BSN. 
Paga tinu : wak bon unda e number di servisio sivil, BSN, ta pará riba bo prueba di identidat. E number akí por ta pará tambe den un repi abou di e dokumento. Wak pa ei tambe bo kambia e number di BSN di tal forma ku no por les’é. 

Riba e dokumento mester tin bo nòmber, fecha di nasementu, firma i e fecha di balides di e dokumento. Pues bo no tin mag di kambia nan di tal forma ku no por lesa nan mas.

Ku e app KopieID bo por pone un marka di awa tambe den e dokumento. Den e marka di awa akí bo ta pone e meta pa kua bo ta traha e kopia. Despues bo por manda e kopia òf prent e.

Download KopieID app

Bo por download e KopieID den Apple App Store òf Google Play Store, E app ta un produkto di Servisio di Gobièrnu di Reino pa Dato di identidat, ku ta parti di ministerio di Asuntu Interno i Relashon di Reino.

Pa kuantu hende mi tin mag di vota ku un apoderashon

Pa kada elekshon bo tin mag di vota pa maksimal 2 hende ku apoderashon. Esaki por solamente pareu ora ku bo mes ta vota.

Apliká pa pas pa vota pafó di Boneiru

Bo no ta 6 di yüni 2024 na Boneiru pero na un otro munisipio òf entidat públiko? I bo tin gana pa bo mes bai vota? Apliká e ora ei pa e pas pa vota pafó di Boneiru. Ku e pas pa vota pafó di Boneiru bo por vota rònt Hulanda, òf den kada un di e entidatnan públiko.
Si bo a apliká pa un pas pa vota pafó di Boneiru, bo por vota solamente ku e pas akí. Bo no ta haña un pas nobo si bo pèrdè esaki. Na urna bo ta duna bo pas pa vota pafó di Boneiru i bo ta mustra bo prueba di identidat 

Bo por apliká na dos manera pa bo pas pa vota pafó di Boneiru:
1. Ònlain via e formulario aki. Por hasi  esaki di djamars 14 di mei 2024 te ku djaluna 3 di yuni 2024. Ta manda e pas pa bo vota pafó di Boneiru na kas pa bo.
2. Na bali di elekshon na departamento di Asuntu Sivil, Kaya Neerlandia 40. Esei por di djaluna 13 di mei te djárason 5 di yüni 2024, 12:00 or. Bai ku bo prueba di identidat bálido na e bali di elekshon. Bo ta haña bo pas pa vota pafó di Boneiru mesora.

INFORMASHON DI PARTIDO

Mas informashon?